1. ძალიან მეუხერხულება მოგმართოთ ამ კითხვით, მაგრამ უკვე ძალიან ვნერვიულობ. სულ რაღაც 2 დღის წინ მქონდა დაუცველი ანუ არაუსაფრთხო სქესობრივი კონტაქტი...ძალიან ნასვამი ვიყავი...არც მანდილოსანი, პარტნიორი არ გახლდათ ჩვეულებრივი გოგო, მსუბუქი ყოფაქცევის მანდილოსანი იყო..იმ წუთას ისეთი მთვრალი ვიყავი, რომ ვერც ვაანალიზებდი რას ვაკეთებდი...ჩემი კითხვა კი შემდეგში მდგომარეობს...ძალიან მეშინია ვირუსის...როდის შეიძლება რომ მივიდე ექიმთან და ავიღო ანალიზები ყველა ვირუსზე, როდიდად გამოჩნდება თუ რამე მჭირს? ძალიან გთხოვთ იქნებ უპასუხოდ არ დამიტოვოთ ეს წერილი.
პასუხი: დაუცველი სქესობრივი კონტაქტის შემდეგ საუკეთესო ვარიანტია სქესობრივი პარტნიორის გამოკვლევა სქესობრივი გზით გადამდებ ინფექციებზე და რომელიმეს აღმოჩენის შემთხვევაში სათანადო პროფილაქტიკური კურსის ჩატარება. თუ ამის შესაძლებლობა არ არის (უცნობი პარტნიორი, ან მისი კატეგორიული უარი გამოკვლევაზე, ან სხვ.), უნდა დაელოდოთ კლინიკურ გამოვლინებას (წვა, ტკივილი, გამონადენი, გამონაყარი და სხვ.) და ასეთის შემთხვევაში მიმართოთ ვენეროლოგს. სისხლის შემოწმებას სქესობრივი გზით გადამდებ ინფექციებზე აზრი აქვს მხოლოდ ერთი თვის შემდეგ.
2. თქვენი დახმარება მჭირდება და არც ვიცი რით დავიწყო! მემგონი ტრიფერი მაქვს! უფრო სწორად ჩემს პარტნიორს აღმოუჩინეს და მეც სიმპტომები მაქვს იგივე! ძალიან დიდი ბოდიში, რომ გაწუხებთ, მაგრამ აღარ ვიცი რა ვქნა! რჩევა მინდა თქვენგან. რა გავაკეთო? ექიმთან ვერ მივდივარ, არვიცი, ალბათ მორიდების მომენტია თუ რა არც ვიცი. შეგიძლიათ უბრალოდ დამისახელოთ მედიკამენტები და მე თვითონ რომ ვიმკურნალო? მთელი ცხოვრება თქვენი მადლობელი ვიქნები ქალბატონო თინა! 19 წლის ვარ..
ვენერიული დაავადების გამოკვლევა და მკურნალობა ჩემ კომპეტენციაში არ შედის და თავს უფლებას ვერ მივცემ წამლები დაგინიშნო, მაშინ, როდესაც გამოკვლევით არ გაქვს დადგენილი თუ რა გჭირს. მე შემიძლია შემდეგნაირად დაგეხმარო: ხვალ ან როდესაც მოისურვებ (რაც მალე უკეთესი) მოდი დილით მოუშარდავი ჩვენს ინსტიტუტში და ჩვენს ვენეროლოგებს გაგასინჯებ (თუ პრობლემა გაქვს ანონიმურობაც დაცული იქნება), ისინი გაგიკეთებენ ანალიზებს და ჩაგიტარებენ მკურნალობას. სამარცხვინო და მოსარიდებელი აქ არაფერია, ხდება ხოლმე. თუმცა ჭკუა იხმარე სხვა შემთხვევებში და იცოდე, რომ არსებობს “ტრიფერზე” უარესი დაავადებებიც, რომლებიც ძნელად ინკურნება, ან საერთოდ არ ინკურნება. ინსტიტუტში მეორე სართულზე იპოვი ჩემ ოთახს.
3. გთხოვთ, მითხრათ, როგორ მოვიშორო „მაზოლები.“
პასუხი: „მაზოლების” მკურნალობის რამოდენიმე გზა შემიძლია შემოგთავაზოთ: 1. აფთიაქში იყიდება სპეციალური დასარბილებელი პლასტირები. შეგიძლიათ ინსტრუქციას გაეცნოთ და თქვენ თვითონ დაიკრათ. 2. ჩვენთან ინსტიტუტში შეგიძლიათ მობრძანდეთ და ექთანი დაგადებთ კოჟიჟზე სპეციალურ წამალს. 3. ჩვენს ინსტიტუტში მოქმედებს პოდოლოგიური კაბინეტი, სადაც ექიმი პოდოლოგი აპარატით ამუშავებს კოჟიჟებს. სამივე ეფექტურია. განსხვავება კვალიფიკაციასა და ფასებშია.
4. სახეზე, ყვრიმალზე დიდი ხანია მქონდა პატარა ჩაქცევა ვარსკვლავივით, ძაფებივით პატარა კაპილარები ჩანდა. დღეს დილით ერთ-ერთი კაპილარი სიგრძეზე ჩამოსულა, როგორც ჩამოკაწრული, ძაფივითაა ისიც. რა საშუალებებით ხდება კანქვეშა კაპილარების გაქრობა, რაიმე კრემს ხომ არ მირჩევდით?
პასუხი: თქვენს მიერ აღწერილი სურათი შეესაბამება ტელეანგიექტაზიებს. მისი მოშორება შეიძლება ელექტროკოაგულაციით კოსმეტიკის კაბინეტში.
5. დიდი ხანია დენის ეპილატორს ვხმარობ, რის გამოც ფეხებზე თმა მიბრუნდება და ლაქები გამიჩნდა, განსაკუთრებით ბიკინის ზოლში. იქნებ რამე მირჩიოთ?
პასუხი: რამოდენიმე ხნით უნდა მიატოვო გაპარსვა. პინცეტით ამოიღო ჩაბრუნებული თმები და დაამუშავო უფერო კასტელანის სითხით, ჩხირზე ბამბით, სანამ წარმოქმნილი ანთებითი კვანძები კანის დონეზე არ დადგება და ქერქი არ მოშორდება, არ გაიპარსო.
6. ჩემს 16 წლის ბიჭს ზაფხულიდან აქვს მეჭეჭი ფეხზე. ვიხმარეთ სოდიანი აბაზანები და იოდი მაგრამ შედეგი არ გამოიღო. სიარულშიც უშლის ხელს. ხომ ვერ გვირჩევდით რაიმე საშუალებას სახლის პირობებში სამკურნალოდ?
პასუხი: შეგიძლიათ იხმაროთ მაზოლის წამალი, რომელიც დაარბილებს და შესაძლოა ამოაგდებს კიდეც მეჭეჭს, მაგრამ შემდეგ საჭირო იქნება მისი მოწვა ქარჩაულით (როცა გარქოვანებული აღარ იქნება).
